10-декабрь 1966-жылы туулган. 1991-жылы Кыргыз Мамлекеттик улуттук университетин (география факультетин) бүтүргөн. 2002 – жылы кандидаттык диссертациясын, 2014-жылы докторлук диссертациясын жактаган. 2005 – жылы доцент наамын алган, 2012-жылдан бери профессордун милдетин аткаруучу. 1991-2007-жылдары К.Тыныстанов атындагы Ысык-Көл мамлекеттик университетинде окутуучу болуп иштеген. 2007-2012-жылдары М.Рыскулбеков атындагы Кыргыз экономикалык университетинин "Менеджмент жана туризм" факультетинин деканы болуп иштеген. 2013 – жылы М. Рыскулбеков атындагы КЭУнун сапат жана аккредитация бөлүмүнүн башчысы болуп иштеген. 2014-2016-жылдары Кыргыз Республикасынын Билим берүү жана илим министрлигинин кесиптик билим берүү башкармалыгын, 2016-2018 – жылдары КР ББИМ караштуу Илим департаментинин башкармалыгын жетектеген. 2018-2024-жылдары Кыргыз Республикасынын Улуттук илимдер академиясынын Суу маселелери жана гидроэнергетика институтунун директору болуп иштеген. 2024-жылдан азыркы кезге чейин Жусуп Баласагын атындагы Кыргыз улуттук университетинин ректору. 

Д.Чонтоев өзүнүн илимий ишмердигин Борбор Азиянын География, экология, туризм жана суу ресурстарына арнаган. Бул багыттар боюнча 75тен ашык илимий макалалардын, беш окуу-усулдук колдонмолордун жана беш монографиянын автору. Ар кайсы өлкөлөрдө ондон ашык стажировкадан өткөн, алардын арасында 2005-жылы Японияда экотуризм боюнча стажировка, 2012-жылы Түркияда туризм боюнча стажировка, 2018-жылы Кытайда экология жана суу ресурстары боюнча стажировка, 2019-жылы Кенияда суу ресурстары боюнча стажировка жана башкалар бар. Д. Чонтоев Борбордук Азиянын суу ресурстарын изилдөөгө зор салым кошкон, анын эмгектери суу ресурстарын башкаруу, аларды сарамжалдуу пайдалануу жана коргоо маселелерине арналган. Ал ошондой эле экология жана туризм боюнча изилдөөлөрү менен белгилүү.